हरिनगर । प्रहरीले धनकुटा र उदयपुर जिल्लामा गाँजा खेती नष्ट गर्ने अभियान सञ्चालन गरेको छ ।
ती जिल्लाका विभिन्न स्थानमा अवैध रूपमा लगाएको र प्राकृतिक रूपमा डाँडा पाखामा हुर्केका गाँजाको बोट प्रहरीले नष्ट गर्दै आएको कोशी प्रदेश प्रहरी कार्यालय विराटनगरले जनाएको हो ।
प्रदेश प्रहरीको ‘सुरक्षा सुनिश्चितता अभियान २०८०’ कार्यक्रम अनुसार अवैध रूपमा लगाएका गाँजाका बोटहरू नष्ट गर्ने अभियान सञ्चालन गरिएको उक्त कार्यालयले जनाएको छ ।
यसै क्रममा शुक्रवार धनकुटाका ३ गाउँपालिकामा ३ हजार वटा गाँजाको बोट फडानी गरिएको छ । इलाका प्रहरी कार्यालय छिन्ताङ, प्रहरी चौकी आँखीसल्ला र त्रिवेणीबाट परिचालन भएको प्रहरी टोलीले शहिदभुमी गाउँपालिका एरियाका विभिन्न स्थानहरूमा प्राकृतिक रूपमा डाँडा पाखामा हुर्केका गाँजाको बोट नष्ट गरेको हो ।
प्रहरी टोलीले धनकुटा जिल्लामा करिब ३ हजार वटा गाँजाका बोटहरू फडानी गरी जलाई नष्ट गरेको प्रदेश प्रहरी कार्यालयले जनाएको छ ।
यसै गरी उदयपुर स्थित इलाका प्रहरी कार्यालय भुटार रौतामाईको प्रहरी गस्ती टोलीले रौतामाई गाउँपालिका-२ ओख्रेनि स्थित पाखा बारीमा रहेको गाँजाको बोट नष्ट गरेको छ । अवैध रूपमा लगाइएका गाँजाका बोटहरू नष्ट गर्ने कार्य निरन्तर रूपमा सञ्चालन गरिने कार्य जारी रहने प्रदेश प्रहरीले जनाएको छ ।
