देवानगञ्ज । “खुशी किसान, देवानगञ्जको पहिचान” मूल नाराका साथ देवानगञ्ज गाउँपालिकाका अध्यक्ष वेचन प्रसाद मेहता आफ्नो चुनावी एजेन्डालाई कार्यान्वयन गर्न सक्रिय देखिएका छन्। गाउँपालिकाभर विधुतीकरणलाई पहिलो प्राथमिकतामा राख्दै अध्यक्ष मेहताले किसानलाई सिँचाइ तथा कृषि उत्पादनमा सहयोग पुर्याउने उद्देश्यले विधुतीकरण अभियानलाई तीव्रता दिएका छन्।
आज वडा नं. ७ मा विधुतीकरण कार्य सुरु भएको छ। यसअघि वडा नं. १, २, ३, ४, र ५ मा यो काम सम्पन्न भइसकेको छ। वडा नं. ७ को काम सम्पन्न भएलगत्तै वडा नं. ६ मा पनि विधुतीकरण सुरु गरिने योजना रहेको अध्यक्ष मेहताले जानकारी गराएका छन्।
देवानगञ्ज गाउँपालिका कृषि-योग्य जमिनले सम्पन्न क्षेत्र हो। यहाँका ९० प्रतिशतभन्दा बढी जनता कृषिमा आश्रित छन्। यसलाई ध्यानमा राख्दै गाउँपालिका अध्यक्ष मेहताले सिँचाइ र कृषि उत्पादनलाई सहज बनाउन विधुतीकरणलाई पहिलो प्राथमिकता दिएको बताए।
“यस अभियानले कृषकहरूको जीवनस्तर सुधार गर्न मद्दत पुर्याउनेछ। सिँचाइका लागि पानीको सहज पहुँचले उत्पादकत्वमा वृद्धि हुनेछ,” अध्यक्ष मेहताले भने।
गाउँपालिकाका जनतालाई सहयोगका लागि आग्रह गर्दै मेहताले भने, “यो काम जनताको हितका लागि हो। यसलाई सफल बनाउन सबैले एकजुट भएर सहयोग गर्न आवश्यक छ। कुनै पनि बाधा-अड्चनले यो अभियानलाई रोक्न सक्दैन।”
स्थानीय किसानहरूले विधुतीकरणले कृषिमा नयाँ युगको शुरुवात हुने आशा व्यक्त गरेका छन्। विधुतीकरणले न केवल सिँचाइ प्रणालीलाई सुदृढ बनाउनेछ, तर उद्योग, व्यापार, र ग्रामीण क्षेत्रमा समग्र विकासलाई पनि गति दिने विश्वास गरिएको छ।
यस प्रकारको विकास योजनाले देवानगञ्ज गाउँपालिकालाई आत्मनिर्भर बनाउन महत्वपूर्ण योगदान पुर्याउने स्थानीय विज्ञहरूले बताएका छन्।
