देवानगञ्ज । प्राज्ञिक विद्यार्थी परिषद् नेपाल मधेश प्रदेशको आयोजनामा नेपालको समग्र शिक्षाको अवस्था, चुनौती र समाधानका विषयमा शिक्षा कार्यशाला हुने भएको छ । असार ३० गते शनिबार वीरगन्जमा कार्याशाला हुने परिषद्का कोशी र मधेष प्रदेश संगठन सचिव छितराज न्यौपानेले जानकारी दिए ।
कार्यशालामा राष्ट्रिय परीक्षा बोर्डका अध्यक्ष डा. महाश्रम शर्माले कार्यपत्र प्रस्तुत गर्ने छन् । उक्त कार्यपत्रमाथि मधेश विश्वविद्यालयका उपकुलपति प्रा. डा. दीपक शाक्य, त्रिभुवन विश्वविद्यालय बन अध्ययन संस्थानका पूर्व डीन डा. जीबनाथ पाण्डे र शिक्षाविद डा. कृष्ण चन्द्र साहले टिप्पणी गर्ने छन् । मधेश प्रदेशका शिक्षा तथा समाज कल्याण मन्त्री महेश यादव र विद्यार्थी परिषद्का राष्ट्रिय संगठन सचिव नारायण प्रसाद ढकालले कार्यशालाको उद्घाटन गर्ने कार्यतालिका रहेको कार्यशाला संयोजक परिषद्का राष्ट्रिय छात्रा प्रमुख लक्ष्मी कर्ण दत्तले जानकारी दिइन् ।
परिषद्का मधेश प्रदेश अध्यक्ष डा. सुष्मा तिवारीले नेपालको समग्र शिक्षाको अवस्था, चुनौती र समाधान विषयक कार्यशालामा मधेश प्रदेशका आठ वटै जिल्लाबाट शिक्षासँग सरोकार राख्ने शिक्षाविद्, विश्वविद्यालयका प्राध्यापक, विद्यालयका शिक्षक शिक्षिका, प्राचार्य एवम् लगानीकर्ताहरूको सहभागीता रहने बताइन् ।
यसअघि परिषद्ले कोशी प्रदेशमा कार्यशाला सम्पन्न गरिसकेको कोशी र मधेष प्रदेश संगठन सचिव न्यौपानेले जानकारी दिए ।
