तस्विर : नमो अनलाईन
इनरुवा । चराको लागि प्रशिद्ध मानिने कोशीटप्पु वन्यजन्तु आरक्षमा पछिल्लो समय चराको संख्यामा कमी आएको छ ।
मिड–विन्टर वाटर वर्ड सेन्सस २०२४ अन्तर्गत यस वर्ष कोशीटप्पु आरक्ष लगायत कोशी नदी क्षेत्रमा गरिएको चरा गणनाका क्रममा आरक्ष क्षेत्रमा चराको संख्यामा कमी आएको हो । आरक्षमा यस वर्ष ५३ प्रजातिका पाँच हजार पाँच सय २७ को सङ्ख्यामा चरा फेला परेको छ ।
गत वर्ष ५६ प्रजातिका सात हजार पाँच सय ७३ चरा रहेको तथ्याङ्क रहेको छ । बर्सेनि नयाँ–नयाँ प्रजातिका चरा आउने क्रम थपिएपनि यस वर्षको गणनामा चराको प्रजाति र सङ्ख्यामा कमी आएको राष्ट्रिय प्रकृति संरक्षण कोष कोशी संरक्षण केन्द्रका प्रमुख वीरेन्द्र गौतमले बताउनुभयो ।
गत पुस २५ देखि २९ गतेसम्म पाँच दिन लगाएर चरा गणना गरिएको थियो । आरक्षमा सबैभन्दा धेरै ८ सय ४८ को सङ्ख्यामा सिलसिले हाँस रहेको उहाँले जानकारी दिनुभयो ।
त्यसैगरी उच्च सङ्ख्यामा फेला परेका १० प्रजातिका चरामध्ये चखेवा पाँच सय छन भने राज हुटिट्याउ चार सय ५५, जलेवा चार सय ४५, वस्तु बकुल्ला तीन सय ७६, सानो जलेवा तीन सय ७१, कर्रा सवारी दुई सय ५७, लामाऔँले दुई सय २२, आसकोटे बकुल्ला दुई सय १० र जलरङ्ग एक सय ८७ रहेको उहाँले बताउनुभयो ।
पानीमा आश्रित चरालाई सिमसार संरक्षणको अभाव हुनुका साथै आहाराको कमीले चराको सङ्ख्या घटेको हुनसक्ने कोशी पक्षी समाजका अध्यक्ष चक्र तिम्सिनाले बताउनुभयो ।
चराको गुणस्तरीय बासस्थानको अभाव, बासस्थान क्षेत्रमा भइरहेका विकास निर्माण, खेतीबालीमा बढ्दो विषादिको प्रयोग र मानवीय क्रियाकलापले गर्दा चराका सङ्ख्यामा कमी आएको उहाँले जानकारी दिनुभयो ।
