तस्विर : फाईल
काठमाडौं । प्रधानमन्त्री कप महिला टी-२० राष्ट्रिय क्रिकेट प्रतियोगिताको उपाधिका लागि आज अपराजित एपीएफ र कोशी प्रदेश भिड्दैछन् ।
खेल कीर्तिपुरस्थित त्रिवि अन्तर्राष्ट्रिय क्रिकेट मैदानमा बिहान ११ बजे सुरु हुनेछ ।
यसपटक राउण्ड रोविन लिगमा भएको प्रतियोगितामा एपीएफ लिग चरणमा अपराजित रहँदै पहिलो र कोशी दोस्रो स्थानमा थियो । पहिलो क्वालिफायरमा एपीएफले कोशीलाई नै हराएर फाइनल पुगेको थियो ।
यस्तै कोशीले भने एलिमिनेटरको विजेता तथा साविक विजेता सुदूरपश्चिम प्रदेशलाई हराएर फेरि एपीएफसँग फाइनलमा भेट पक्का गरेको हो ।
यस संस्करणमा एपीएफ सबै ८ खेलमा अपराजित छ । फाइनल पुग्ने क्रममा एपीएफले कोशी प्रदेशलाई पनि दुईपटक हराइसकेको छ ।
लिग चरणमा एपीएफले कोशीलाई ८ विकेटले सहजै पराजित गरेको थियो । यस्तै पहिलो क्वालिफायरमा एपीएफले कोशीलाई ५२ रनले पराजित गरेको थियो ।
कोशीले यस संस्करणमा ९ खेल खेल्दा ७ खेल जितेको छ भने एपीएफसँगको २ खेलमा पराजित भएको थियो ।
त्यसैले फाइनलमा एपीएफ फेभरेट देखिन्छ । एपीएफ अपराजित रहँदै च्याम्पियन बन्ने लक्ष्यमा रहँदा कोशी एपीएफविरुद्ध बदला सहित उपाधि जित्न चाहन्छ ।
राष्ट्रिय खेलकुद परिषद्को कार्यक्रमअन्तर्गत नेपाल क्रिकेट संघ क्यानले आयोजना गरिरहेको प्रतियोगिता पहिलोपटक राउण्ड रोविनका आधारमा खेलाइएको हो । जसले गर्दा खेलाडीले धेरै खेल खेल्ने अवसर पाएका हुन् ।
व्यक्तिगततर्फ पनि एपीएफ र कोशीका खेलाडी उत्कृष्ट प्रदर्शनमा अघि छन् । कोशीकी कप्तान रुबिना क्षेत्रीले ९ खेल खेल्दा दुई अर्धशतकसहित सर्वाधिक २८३ रन बनाएकी छन् ।
दुई अर्धशतक नै प्रहार गरेकी एपीएफकी इन्दु बर्मा २३१ रन सहित सर्वाधिक रन बनाउनेमा दोस्रोमा छिन् ।
एपीएफकी ममता चौधरीले पनि २ अर्धशतक प्रहार गरेकी छिन् । उनी ८ खेलबाट १७३ रनसहित सातौं स्थानमा छिन् । ममताले चार इनिङ्समा मात्र ब्याटिङ गरेकी थिइन् ।
यस्तै बलिङतर्फ मधेश प्रदेशकी पूजा महतोले सर्वाधिक १२ विकेट लिएकी छन् । सुदूरपश्चिमको लक्ष्मी साउदले पनि १२ विकेट नै लिएकी छन् । त्यसपछि कोशीकी कप्तान रुबिनाले १० विकेट लिएकी छन् । एपीएफकी करुणा भण्डारीले ९ विकेट लिएकी छन् ।
रुबिना र करुणालाई सर्वाधिक विकेट लिने बलर बन्ने अवसर समेत छ ।
एपीएफकै सुमन विष्ट तथा कोशीकी अप्सरी बेगम, सबनम राई र संगीता राईले समान ८ विकेट लिएका छन् ।
