तस्विर : नमो अनलाइन
विराटनगर । विराटनगर महानगरपालिका वडा नं. ४ का बासिन्दाहरुका लागि उपचारमा विशेष सहुलियत प्रदान गर्न नोवेल मेडिकल कलेज टिचिङ्ग हस्पिटलले नयाँ सुविधा सुरु गरेको छ। मिति २०८१ मंसिर २३ गते सम्पन्न सम्झौतामा वडा नं. ४ का वडा अध्यक्ष श्री जितन थापा र नोवेल मेडिकल कलेजका अस्पताल निर्देशक प्रा. डा. राजेश नेपालले हस्ताक्षर गरेका छन्।
सम्झौताअनुसार, वडा नं. ४ का बासिन्दाहरुले अस्पताल सेवामा २५ प्रतिशत, अपरेसन शुल्क र औषधिमा १० प्रतिशत छुट प्राप्त गर्न सक्नेछन्। साथै, सामाजिक सुरक्षा कोष अन्तर्गतका विरामीहरुले नियमानुसार २० प्रतिशत सहभुक्तानी छुट पाउने व्यवस्था पनि गरिएको छ।
यो सुविधा प्राप्त गर्नका लागि बिरामीले आफ्नो परिचय खुल्ने कागजात अनिवार्य रूपमा पेश गर्नुपर्नेछ। सम्झौता २०८१ मंसिर २३ गतेदेखि लागू भई २०८२ असार मसान्तसम्म कायम रहने छ।
यो सहमति वडाबासीहरुलाई सुलभ उपचार सेवा प्रदान गर्ने उद्देश्यले गरिएको र स्वास्थ्य सेवामा सुधार ल्याउन मद्दत पुग्ने अपेक्षा गरिएको छ।
