तस्विर : नमो अनलाईन
हरिनगर । सुनसरीको हरिनगर गाउँपालिका-२ का २१ वर्षीय पत्रकार रूपेशकुमार मोचीले आफूलाई ज्यान मार्ने धम्की आएको बताएका छन् ।
मुस्लिम समुदायका युवाहरुले समाचार लेखेको विषयलाई लिएर धम्की दिएको पीडित पत्रकारको आरोप छ ।
हरिनगर गाउँपालिका-२ रामनगर भुटाहामा मा ०८० चैत २३ गते मुस्लिम समुदायका युवाले धर्मको विरोध गरेको आरोपमा एक जना युवालाई सार्वजनिक रूपमै कुटपिट गरेको विषयमा समाचार लेखेपछि धम्की आउने गरेको पीडित पत्रकारले बताएका छन् ।
शान्ति सुरक्षा र जीवनको रक्षाको माग गर्दै पत्रकार मोचीले ०८१ वैशाख २४ गते जिल्ला प्रशासन कार्यालयमा निवेदन दिएका छन् ।
यता पत्रकार मोचीले जीवनको सुरक्षा गरीदिन माग गर्दै इन्सेकमा समेत निवेदन दिएको छ ।
जासुस खबरमा कार्यरत पत्रकार मोचीलाई धम्की दिएको विषयमा इन्सेकले जिल्ला प्रशासन कार्यालय र प्रहरीसँग समन्वय गरी दोषीको पहिचान गरी कानुनी कारबाही गर्न माग गरेको छ ।
मानव अधिकार रक्षकसम्बन्धी घोषणापत्र सन् १९९८ ले पत्रकारलाई मानव अधिकार रक्षकका रुपमा परिभाषित गरेको छ ।
