तस्विर : नमो अनलाईन
इनरुवा । झापा र उदयपुरको छुट्टाछुट्टै स्थानबाट प्रतिबन्धित लागूऔषध र निषेधित औषधीसहित ६ जनालाई प्रहरीले पक्राउ गरेको छ ।
झापाको मेचीनगर नगरपालिका ६ स्थित मेचीपुलमा लागूऔषध नियन्त्रण ब्यूरो काँकडभिट्टाबाट र इलाका प्रहरी कार्यालय काँकडभिट्टाबाट खटिएको प्रहरी टोलीले शंकास्पद अवस्थामा भारतबाट नेपाल आउँदै गरेकी सुनसरीको रामधुनी नगरपालिका ७ की २४ वर्षीया कञ्चन परियारलाई ७०० मिलिग्राम ब्राउनसुगर र नगद नेपाली रुपैयाँ एक लाख ३९ हजारसहित नियन्त्रणमा लिएको हो ।
यसैगरी मेचीनगर नगरपालिका १० स्थितबाट इलाका प्रहरी कार्यालय धुलाबारीको प्रहरी टोलीले बिर्तामोड १ का २१ वर्षीय गंगाप्रसाद मगरलाई ५ ग्राम ७६० मिलिग्राम ब्राउनसुगरसहित पक्राउ गरेको छ ।
यसैगरी बिर्तामोड नगरपालिका ३ का २४ वर्षीय अशोक साह र २३ वर्षीय सुमित मल्लिकलाई ८० मिलिग्राम ब्राउनसुगरसहित प्रहरी चौकी बिर्ताबजारले पक्राउ गरेको छ ।
यता, जिल्ला प्रहरी कार्यालय उदयपुरको प्रहरी टोलीले त्रियुगा नगरपालिका १२ का २३ वर्षीय समीर मगर र रोहित चौधरीलाई निषेधित औषधी ३१८ एम्पुलसहित नियन्त्रणमा लिएको छ ।
प्रतिबन्धित लागूऔषधसहित पक्राउ परेका उनीहरूको सम्बन्धित प्रहरी कार्यालयबाट थप अनुसन्धान भइरहेको प्रहरीले जनाएको छ ।
