तस्विर : नमो अनलाईन
भाण्टावारी । कोशी गाउँपालीका वडा नम्बर ३ पश्चिम कुशाहा कि एक युवतीको विवाहको अन्तिम तयारी चलिरहँदा अर्नाको आक्रमणमा परी ज्यान गएको छ ।
कोशी टप्पु बन्यजन्तु आरक्षको संरक्षित क्षेत्रबाट बस्तीमा पसेको अर्नाको आक्रमणबाट स्थानीय २०÷२२ वर्षकी रञ्जुकुमारी मुखियाको अर्नाको आक्रमणमा परी ज्यान गएको हो ।
शनिबारका दिन अन्दाजी २÷३ बजे दिउँसोको समयमा कोशी टप्पुको संरक्षित क्षेत्रबाट बाहिर निस्किएको अर्नाले आफ्नै घर नजिकको आरक्षको मध्यवर्ती क्षेत्रमा रहेको पटेर घारीमा पटेर काट्दै गरेकी रञ्जुमाथि आक्रमण गरेको थियो । रञ्जुमाथि अर्नाले पछाडिबाट निस्किएर आक्रमण गरेको र उनको शब स्थानीयहरुले अर्नाको आक्रमणपछि मृत्यू भएको दुई घण्टापछि फेला परेको थियो ।
उनी कोशी टप्पु क्षेत्रमा माछा मारेर जीविकोपार्जन गर्ने मलाह समुदायका अगुवा गुलाबी मुखियाकी छोरी हुन । मृतक रञ्जुको सोमबारको लागि विवाहको कुरा छिनिएको थियो । घर परिवारमा रञ्जुको विवाहको समारोहको अन्तिम तयारीमा परिवारका सदस्यहरु ब्यस्त थिए । उनी पनि विवाहकै तयारीका लागि पटेर काट्न घर नजिकैको पटेर घारीमा गएको परिवारले जनाएको छ । तर विवाहको तयारीकै क्रममा रहेकी रञ्जुको शब बोकेर अन्तिम संस्कार गर्नुपर्दा परिवारका सदस्यसहित स्थानीयहरु शोकमा डुबेका छन ।
मृतक रञ्जुको निधनप्रति स्थानीयहरुले गहिरो शोक ब्यक्त गर्दै उनको अन्तिम दाह संस्कारमा स्थानीय राजनीतिक र नागरिक अगुवाहरुको सहभागिता रहेको थियो । दाह संस्कार कार्यक्रमा नेपाली कांग्रेस सुनसरी क्षेत्र नं।४ का महासमिति सदस्य तथा कोशी प्रदेश सभा सदस्य सदानन्द मण्डल,नेपाली कांग्रेस कोशी गाउँपालीका सभापति तथा कोशी गाउँपालीका वडा नम्बर ३ का वडा अध्यक्ष सुलेमान मन्सुरी,कोशी टप्पु लर्निङ्ग ग्राउन्ड संस्थाका अध्यक्ष राजकुमार सिंह लगायतका स्थानीय अगुवाहरुको सहभागिता थियो ।
कोशी टप्पु बन्य जन्तु आरक्षमा संरक्षित बन्य जन्तुको आक्रमणबाट मध्यवर्ती क्षेत्रमा बर्षेनी ठूलो जनधनको क्षति हुने गरेको छ । आरक्षमा रहेको अर्ना र जंगली हात्तीसँगै बदेलहरु आहारको खोजीमा मध्यवर्ती क्षेत्रका बस्तीहरुमा पसेर मानिसहरुमाथि आक्रमण गर्नुका साथै उनीहरुले लगाएको बालिनालीहरुमा क्षति पु¥याउने गरेका छन ।
