तस्विर : नमो अनलाईन
विराटनगर । समाजसेवी अभिषेक गिरिले स्थापना गरेको गिरि फाउन्डेसनले विराटनगरका दुइटा विद्यालयका विद्यार्थीहरूलाई स्वेटर र शैक्षिक सामग्री वितरण गरेको छ ।
सोमबार फाउन्डेसनका अध्यक्ष गिरिले विराटनगर महानगरपालिका-८ का दुई सामुदायिक विद्यालयमा न्यानो कपडा स्वेटर र ह्वाइट बोर्ड वितरण गरेका हुन् ।
विराटनगर-८ स्थित मदरसा तालिमुल कुरआन माध्यमिक विद्यालयमा अध्ययनरत ४५ छात्रछात्रालाई स्वेटर वितरण गरे । साथै, उनले अध्यापनलाई सहज बनाउन तीन थान ह्वाइट बोर्ड पनि प्रदान गरे ।
कार्यक्रममा बोल्दै अध्यक्ष गिरिले सामुदायिक विद्यालयका विद्यार्थीले जाडोमा संघर्षका साथ अध्ययन गर्नपरेको उल्लेख गरे ।
उनले भने, ‘जाडोमा यहाँ पढ्ने विद्यार्थीले कठ्यांग्रीनु पर्ने अवस्था थियो । जाडोकै कारण विद्यालयमा नियमित उपस्थित हुने विद्यार्थीको संख्या घटेको थाहा पाएपछि सहयोग गरेको हुँ ।’
विपन्न विद्यार्थीको बाध्यता टार्न सकेको सहयोग गरेको उल्लेख गर्दै फेरि पनि सहयोगको हात अघि बढाउने प्रतिबद्धता जनाए ।
वि.सं २०६५ सालमा स्थापना भएको उक्त विद्यालयमा ३१५ जना विद्यार्थी अध्ययनरत भए पनि अहिले २९० नियमित छन् । छुटेका अरू सबै विद्यार्थीलाई पुन: सहयोग गर्ने उनले बताए ।
गिरि फाउन्डेसनले यसअघि पनि सहयोग गर्नेगरेको बताउँदै विद्यालयका प्रअ अब्दुल सुबहानले फाउन्डेसनप्रति आभार ब्यक्त गरे ।
उनका अनुसार विद्यालयमा १३ जना शिक्षक शिक्षिका रहेको उक्त परम्परागत तथा धार्मिक विद्यालयमा अरबी, उर्दु, दिनियाद भाषाबाट पनि अध्यापन हुने गरेको छ ।
यस्तै, गिरि फाउन्डेसनले विराटनगर-८ कै श्री ज्ञान निकुञ्ज आधारभूत विद्यालयका विद्यार्थीलाई पनि स्वेटर वितरण गरेको छ ।
फाउन्डेसनका अध्यक्ष गिरिले त्यहाँ अध्ययनरत ५० जना विद्यार्थीलाई स्वेटर र पाँच थान ह्वाइट बोर्ड सहयोग गरे ।
२०४६ मा स्थापित सो विद्यालयमा कुल १२० विद्यार्थी अध्ययनरत रहेका छन् ।
